Господи Боже сил, при́зри в милости на смире́нныя рабы Твоя, и благоприятну сотвори молитву нашу о Церкви и о всех лю́дех Твоих.
Верным чадам Твоим, о единстве Русския Церкви ревну́ющим, поспешеству́й, в духе братолюбия укрепи и от бед избави. Запрети раздирающим во омрачении умов и ожесточении сердец ризу Твою, я́же есть Церковь Бога Жива́го, и за́мыслы их ниспровергни!
Благодатию Твоею вла́сти предержащия ко всякому благу наста́ви и мудростию обогати, воинов в за́поведех Твоих утверди, крепость духа им низпосли. Лишенныя кро́ва в до́мы введи, алчущия напитай, недугующия укрепи и исцели, в смятении и печали сущим надежду благую и утешение пода́ждь, на брани убиенным, от ран и болезней скончавшимся, прощение грехо́в и блаженное упокоение даруй.молитособые
Испо́лни нас я́же в Тя веры, надежды и любве́, возста́ви па́ки во всех стра́нах Святой Руси мир и единомыслие, яко да едиными усты и единым сердцем, испове́мыся Тебе, Единому Богу в Троице сла́вимому, Отцу и Сыну и Святому Духу, ныне и присно, и во веки веков. Аминь.

По благословению митрополита Минского и Заславского Вениамина от 30 апреля 2024 г.